சென்னை : தமிழ்நாடு முதலமைச்சர் சி.ஜோசப் விஜய் அவர்கள், மாநிலம் முழுவதும் செயல்பட்டு வரும் அம்மா உணவகங்களை முழுமையாக புதுப்பித்து, நவீனமயமாக்குவதற்கான அதிரடி உத்தரவை பிறப்பித்துள்ளார்.
சென்னை தலைமைச் செயலகத்தில் நடைபெற்ற உயர் அதிகாரிகள் ஆலோசனைக் கூட்டத்தில், ஏழை எளிய மக்களின் நலனைக் கருத்தில் கொண்டு இந்த முக்கிய தீர்மானம் எடுக்கப்பட்டது. அதன்படி, தமிழகம் முழுவதும் உள்ள அம்மா உணவகங்களின் உள்கட்டமைப்பு வசதிகளை உடனடியாக மேம்படுத்த அதிகாரிகளுக்கு அறிவுறுத்தப்பட்டுள்ளது.
மேலும், உணவகங்களுக்குத் தேவையான புதிய சமையல் உபகரணங்களை தங்கு தடையின்றி விரைவாக கொள்முதல் செய்யவும் உத்தரவிடப்பட்டுள்ளது. மறுசீரமைப்பு பணிகள் மற்றும் புதிய உபகரணங்கள் வாங்குவதற்கான செலவினங்களை, அந்தந்த மாநகராட்சிகள் மற்றும் நகராட்சிகளின் பொது நிதியிலிருந்து மேற்கொள்ள அறிவுறுத்தப்பட்டுள்ளது.
பொதுமக்களுக்கு வழங்கப்படும் உணவுகள் சுவையாகவும், சுகாதாரமான முறையிலும் தயாரிக்கப்படுவதை அதிகாரிகள் உறுதி செய்ய வேண்டும் என்றும், தரமான உணவுகள் எவ்வித தாமதமுமின்றி தினசரி ஏழை எளிய மக்களிடம் சென்றடைய வேண்டும் என்றும் முதலமைச்சர் வலியுறுத்தியுள்ளார்.
தற்போது பெருநகர சென்னை மாநகராட்சியின் கீழ் 383 அம்மா உணவகங்கள் செயல்பட்டு வருகின்றன. இதர மாநகராட்சிகள் மற்றும் நகராட்சிகளின் கீழ் 237 உணவகங்கள் இயங்கி வருகின்றன. இதன்மூலம் தமிழகம் முழுவதும் மொத்தம் 620 அம்மா உணவகங்கள் பொதுமக்களின் பயன்பாட்டில் உள்ளன.
மேலும், முந்தைய ஆட்சிக்காலத்தில் அறிமுகப்படுத்தப்பட்ட மக்கள் நலத்திட்டமாக இருந்தாலும், எந்தவித அரசியல் காழ்ப்புணர்ச்சியுமின்றி, ஏழை எளிய மக்களின் பசியைப் போக்கும் நோக்கில் இந்தத் திட்டத்தை மேலும் மேம்படுத்தும் முதலமைச்சர் விஜயின் நடவடிக்கை மக்களிடையே பெரும் வரவேற்பைப் பெற்றுள்ளது.