சென்னை, ஜூன் 29: சென்னை ராயப்பேட்டை பீட்டர் சாலையில் அமைந்துள்ள தி நியூ கல்லூரி வளாகத்தில், AMP (Association of Muslim Professionals – முஸ்லிம் தொழில்முறை வல்லுநர்கள் சங்கம்), தி நியூ கல்லூரி மற்றும் சவுத் இந்தியா ஷெல்டர்ஸ் இணைந்து நடத்திய மெகா வேலைவாய்ப்பு முகாம், ஜூன் 27, 2026 அன்று சிறப்பாக நடைபெற்றது.
இந்த வேலைவாய்ப்பு முகாமில் தகவல் தொழில்நுட்பம், வங்கி, உற்பத்தி, சுகாதாரம், சில்லறை விற்பனை உள்ளிட்ட பல்வேறு துறைகளைச் சேர்ந்த 70 முன்னணி நிறுவனங்கள் பங்கேற்றன. மொத்தம் 1,229 நேர்காணல்கள் நடத்தப்பட்ட நிலையில், அதில் 489 இளைஞர்கள் பணிக்குத் தேர்வு செய்யப்பட்டனர். இதன் மூலம் நூற்றுக்கணக்கான இளைஞர்களுக்கு புதிய வேலைவாய்ப்புகள் உருவாகியுள்ளன.
இந்நிகழ்வில் பேசிய தி நியூ கல்லூரியின் தொழில் வழிகாட்டுதல் மற்றும் வேலைவாய்ப்பு பிரிவு இயக்குநர் டாக்டர் A.K.முகமது அலி, “வாய்ப்புகள் தானாக உருவாகாது; அவற்றை நாமே உருவாக்க வேண்டும்” என்ற கிறிஸ் க்ரோசரின் கருத்தை மேற்கோள் காட்டி, இத்தகைய வேலைவாய்ப்பு முகாமை நடத்தி நூற்றுக்கணக்கான இளைஞர்களுக்கு வேலைவாய்ப்பை ஏற்படுத்திய AMP அமைப்பிற்கு தனது மனமார்ந்த பாராட்டுகளையும் நன்றியையும் தெரிவித்தார்.
AMP தமிழ்நாடு மாநிலத் தலைவர் ஷெரீன் சுல்தானா பேசுகையில், இந்த வேலைவாய்ப்பு முகாம் எந்தவித பாகுபாடுமின்றி அனைத்து சமூகத்தினருக்கும் சமமான வேலைவாய்ப்பு வழங்கும் AMP-யின் அர்ப்பணிப்பை பிரதிபலிப்பதாகக் கூறினார். மேலும், இந்த நிகழ்வை வெற்றிகரமாக நடத்த உதவிய அனைத்து கூட்டாளர்கள், ஆதரவாளர்கள் மற்றும் நிறுவனங்களுக்கும் தனது நன்றியை தெரிவித்தார்.
AMP வேலைவாய்ப்பு உதவி பிரிவு (EAC) தலைவர் ஷாஹித் ஹைதர் கூறுகையில், ராயப்பேட்டையில் AMP நடத்தும் நான்காவது வேலைவாய்ப்பு முகாமும், சென்னையில் நடைபெறும் ஆறாவது முகாமுமாக இது அமைந்துள்ளதாக தெரிவித்தார். வேலைவாய்ப்பு வழங்குநர்கள் மற்றும் வேலை தேடுவோரிடமிருந்து கிடைத்த மிகப்பெரிய வரவேற்பு, எதிர்காலத்தில் மேலும் பல வேலைவாய்ப்பு முகாம்களை நடத்தும் உற்சாகத்தை அளித்துள்ளதாக அவர் கூறினார்.
AMP வேலைவாய்ப்பு உதவி பிரிவு (EAC) செயலாளர் இம்தியாஸ் சையத் பேசுகையில், இந்த வேலைவாய்ப்பு முகாம் தடையின்றி சிறப்பாக நடைபெற்று, வேலை தேடுவோர் மற்றும் நிறுவனங்கள் இருவருக்கும் பயனுள்ள தளமாக அமைந்ததாகக் குறிப்பிட்டார். தகுதியான இளைஞர்களை நாடு முழுவதும் உள்ள நிறுவனங்களுடன் இணைத்து அர்த்தமுள்ள வேலைவாய்ப்புகளை உருவாக்கும் பணியில் AMP தொடர்ந்து செயல்படும் என்றும் அவர் தெரிவித்தார்.
ஆயிரக்கணக்கான வேலை தேடுவோர் ஆர்வத்துடன் பங்கேற்ற இந்த முகாமில், பலர் நேரடியாக நிறுவனங்களின் முதற்கட்டத் தேர்விலும், நேர்காணல்களிலும் வெற்றி பெற்று உடனடி தேர்வுப் பட்டியலில் இடம்பெற்றனர். இதனால், சமீப காலங்களில் சென்னையில் நடைபெற்ற மிகச் சிறந்த வேலைவாய்ப்பு முயற்சிகளில் ஒன்றாக இந்த முகாம் அமைந்துள்ளது.
இந்த மெகா வேலைவாய்ப்பு முகாமின் வெற்றிக்கு AMP சென்னை கிளை, தி நியூ கல்லூரியின் நிர்வாகம், ஆசிரியர்கள், அலுவலர்கள், மாணவர்கள் மற்றும் AMP வேலைவாய்ப்பு உதவி பிரிவு (EAC) குழுவினரின் ஒருங்கிணைந்த பங்களிப்பே முக்கிய காரணமாக அமைந்தது.
சென்னையில் நடைபெற்ற இந்த AMP மெகா வேலைவாய்ப்பு முகாமிற்கு வேலை தேடுவோர் மற்றும் முன்னணி நிறுவனங்கள் மத்தியில் அமோக வரவேற்பு கிடைத்தது குறிப்பிடத்தக்கது.