சென்னை, அக். 09:
பெரம்பூர் வாசுதேவன் தெருவில், பாதாளச் சாக்கடைப் பணிகளுக்காகக் கொட்டப்பட்டு, பொதுமக்களுக்கும் வாகனப் போக்குவரத்திற்கும் இடையூறாக இருந்த ஜல்லிக் கற்கள் மற்றும் கான்கிரீட் கழிவுகள், மார்னிங் டைம்ஸ் பத்திரிகையின் கவனத்திற்குக் கொண்டு செல்லப்பட்டதைத் தொடர்ந்து அகற்றப்பட்டுள்ளன.
இதையடுத்து, அப்பகுதியில் சாலை சீரமைக்கப்பட்டு, பொதுமக்களின் நீண்ட நாள் அவதிக்கு முற்றுப்புள்ளி வைக்கப்பட்டுள்ளது.
சென்னை பெருநகர மாநகராட்சியின் மண்டலம் 6, வார்டு 67-க்கு உட்பட்ட பெரம்பூர் வாசுதேவன் தெருவில், சென்னை குடிநீர் வாரியத்தின் சார்பில் அண்மையில் பாதாளச் சாக்கடைப் பராமரிப்புப் பணிகள் மேற்கொள்ளப்பட்டன.
இப்பணிகள் நிறைவடைந்த பின்னரும், சாலையில் ஆங்காங்கே கொட்டப்பட்டிருந்த ஜல்லிக் கற்கள் மற்றும் கான்கிரீட் கழிவுகள் முறையாக அகற்றப்படாமல் இருந்ததாகக் கூறப்படுகிறது. இதனால், சாலை வழியாகச் செல்லும் பொதுமக்கள் பெரும் சிரமத்திற்கு உள்ளாகினர்.
குறிப்பாக, பள்ளி மாணவர்கள், முதியவர்கள், இருசக்கர வாகன ஓட்டிகள் மற்றும் கனரக வாகன ஓட்டிகள் சாலையைக் கடந்து செல்வதில் சிரமங்களை எதிர்கொண்டனர். சாலையில் சிதறிக் கிடந்த ஜல்லிக் கற்களால் இருசக்கர வாகனங்கள் சறுக்கி விபத்துகள் ஏற்படும் அபாயமும் நிலவி வந்தது.
மேலும், சாலையில் கொட்டப்பட்டிருந்த கட்டுமானக் கழிவுகள் போக்குவரத்துக்கு இடையூறாக இருந்ததால், அப்பகுதி மக்கள் அவற்றை உடனடியாக அகற்ற வேண்டும் எனக் கோரிக்கை விடுத்தனர்.
வாசுதேவன் தெருவில் பொதுமக்கள் சந்தித்து வந்த இப்பிரச்சினை குறித்து அப்பகுதி மக்கள் தெரிவித்த புகாரின் அடிப்படையில், மார்னிங் டைம்ஸ் பத்திரிகை உரிய நடவடிக்கை எடுக்க முன்வந்தது.
மார்னிங் டைம்ஸ் பத்திரிகையின் உதவி ஆசிரியர் M.அப்துல் ரஹ்மான் அவர்களின் அறிவுறுத்தலின்பேரில், பெரம்பூர் செய்தியாளர் ஜீலானி, சென்னை மாநகராட்சி மற்றும் சென்னை குடிநீர் வாரியத்தின் சம்பந்தப்பட்ட உயர் அதிகாரிகளைத் தொடர்புகொண்டார்.
அப்போது, வாசுதேவன் தெருவில் பாதாளச் சாக்கடைப் பணிகள் முடிவடைந்த பின்னரும் சாலையில் ஜல்லிக் கற்களும் கான்கிரீட் கழிவுகளும் அகற்றப்படாமல் இருப்பதால் பொதுமக்கள் எதிர்கொள்ளும் சிரமங்கள் அதிகாரிகளிடம் எடுத்துரைக்கப்பட்டன.
மேலும், சாலையில் உள்ள கழிவுகளை உடனடியாக அகற்றி, பொதுமக்கள் பாதுகாப்பாகப் பயணிப்பதற்கு உரிய நடவடிக்கை மேற்கொள்ள வேண்டும் என்றும் கோரிக்கை விடுக்கப்பட்டது.
மார்னிங் டைம்ஸ் பத்திரிகையின் சார்பில் விடுக்கப்பட்ட கோரிக்கையைத் தொடர்ந்து, சம்பந்தப்பட்ட அதிகாரிகள் இப்பிரச்சினையில் கவனம் செலுத்தினர்.
இதையடுத்து, சாலையில் கொட்டப்பட்டிருந்த ஜல்லிக் கற்கள் மற்றும் கான்கிரீட் கழிவுகளை அகற்றுவதற்குத் தேவையான நடவடிக்கைகள் மேற்கொள்ளப்பட்டன. அதன்படி, சாலையில் போக்குவரத்துக்கு இடையூறாக இருந்த கழிவுகள் அகற்றப்பட்டு, சாலை சீரமைக்கப்பட்டது.
இதனால், அப்பகுதி மக்கள் எதிர்கொண்டு வந்த சிரமங்கள் நீங்கியதுடன், வாகன ஓட்டிகளும் சாலையைப் பயன்படுத்துவதில் ஏற்பட்டிருந்த இடையூறுகள் குறைந்துள்ளன.
பொதுமக்களின் அன்றாடப் பிரச்சினைகளை உரிய அதிகாரிகளின் கவனத்திற்குக் கொண்டு சென்று, அவற்றுக்குத் தீர்வு காண்பதில் ஊடகங்களின் பங்கு எவ்வளவு முக்கியமானது என்பதற்கு இச்சம்பவம் ஓர் எடுத்துக்காட்டாக அமைந்துள்ளது.
தங்களது கோரிக்கையை ஏற்று, சாலையில் இருந்த ஜல்லிக் கற்கள் மற்றும் கான்கிரீட் கழிவுகளை அகற்ற நடவடிக்கை மேற்கொண்ட சென்னை மாநகராட்சி மற்றும் சென்னை குடிநீர் வாரிய அதிகாரிகளுக்கு அப்பகுதி மக்கள் தங்களது மனமார்ந்த நன்றியைத் தெரிவித்துள்ளனர்.
மேலும், பொதுமக்களின் சிரமத்தை உணர்ந்து, அவர்களின் பிரச்சினையை அதிகாரிகளின் கவனத்திற்குக் கொண்டு சென்று, தீர்வு கிடைக்க நடவடிக்கை மேற்கொண்ட மார்னிங் டைம்ஸ் பத்திரிகைக்கும் அப்பகுதி மக்கள் பாராட்டுகளையும் நன்றியையும் தெரிவித்துக் கொண்டனர்.